Qualques mots que semblan simples, quitament banals, mas qu’an pasmens una fòrça granda importància per ieu.

Decidir de crear un site internet, aquò es pas anodin, aquò es pas un gatget ni un joguet d’òme politic que vòl faire coma plan d’autres o que vòl monstrar qu’es a la punta del progrès multimedià.

Per ieu es fòrça important car un vertadièr engatjament cap a milierats d’estatjants de ma circonscripcion, cap a vosautres.

• L'engatjament de vos informar en temps e ora, gaireben en « live » coma se ditz, de mos actes, de mas intervencions, de mas reünions, en un mot de mon trabalh ara per ara per vosautres, amb vosautres.

• L'engatjament de vos escotar e d’obrar en foncion de las vòstras preocupacions e de las vòstras demandas. En çò nòstre dins Erau, malgrat lo solelh, escaparem pas a la crisi, a las dificultats quotidianas dins totes los mitans, a totas las edats e a totes los nivèls. Disi sovent que ma formacion de mètge m’ajuda subretot a escotar los autres, a faire lor fons d’uèlh coma se ditz e doncas a comprene las urgéncias.

• L'engatjament de vos defendre, de jamai m’alunhar del terren, mas obrar al quotidian per ensajar de melhorar las causas, sens perdre de vista que devi èsser per vosautres un facilitaire, lo que vos pòt permetre d’obrir pòrtas plan sovent tampadas.

• L'engatjament de far ressondir la vòstra votz a l'Amassada Nacionala mas tanben al prèp de las administracions, dels ministèris, del Mediator de la Republica se o calguèsse.

Un deputat vòta las leis solide, mas es subretot lo representant de los que li fan fisança.

Aqueste site, es doncas realizat per vos entendre encara melhor, per vos servir encara melhor.

Alara esitetz pas a me daissar los vòstres comentaris, las vòstras questions, las vòstras reaccions.

Farai tot çò qu’es dins mon poder per vos escotar e vos respondre amb sinceritat.